Nýggj kunngerð um foreldramyndugleika, samveru og bústaðin hjá barninum

Kunngerð um foreldramyndugleika, samveru og bústaðin hjá barninum

Nýggja kunngerðin tekur støði í gomlu kunngerðini, tó soleiðis at hon er dagførd í mun til nýggju lógina, sum kom í gildi 1. januar 2022.

Kunngerðin inniheldur m.a. ásetingar um:

• Viðgerð av málum um avtalu um felags foreldramyndugleika. Avtalur um felags foreldramyndugleika kunnu fráboðast við elektroniskari undirskrift.
• Reglur um góðkenning av avtalu um flyting av foreldramyndugleika til onnur enn foreldrini, herundir krav um vegleiðingarfund og møguleikan hjá Familjufyrisitingini at biðja barnaverndartænastuna um eitt ummæli um partarnar í málinum og um barnið.
• Viðgerð av málum um foreldramyndugleika eftir andlát hjá foreldrum. Familjufyrisitingin kann í hesum sambandi biðja barnaverndartænastuna um eitt ummæli um partarnar í málinum og um barnið.
• Avtalur um foreldramyndugleika verða skrásettar í Landsfólkayvirlitnum, og Familjufyrisitingin kann útflýggja váttan um foreldramyndugleika.
• Avgerðir um bústaðin hjá barninum. Er barnið sambært avtalu ella avgerð í minsta lagi helvtina av tíðini hjá tí eina foreldrinum, verður viðkomandi skrásettur sum bústaðarforeldur.
• Ásetingar um samveru, undir hesum samveru undir eftirlitið og at barnaserkøn kunnu luttaka á samverufundum.
• Ásetingar um barnaserkøna ráðgeving og mekling og ásetingar um, hvussu og nær upplýsingar, sum koma fram undir ráðgevingini ella meklingini kunnu nýtast og latast víðari.
• Luttøku hjá barninum í viðgerðini av málum og reglur um samrøðu við barnaserkøn í hesum sambandi.
• Málsræði. Ásett verður, nær Familjufyrisitingin kann viðgera eitt mál um foreldramyndugleika, samveru og bústaðin hjá barninum. Støðið verður í hesum sambandi tikið í, hvar barnið býr ella uppiheldur sær heldur enn við støði í viðurskiftunum hjá foreldrunum. Reglurnar samsvara við tað, sum er ásett í rættargangslógini.

Møguligar viðmerkingar kunnu sendast Løgmálaráðnum á teldupost lmr@lmr.fo í seinasta lagi týsdagin 24. juni 2025.

Uppskot Til Kunngerð Um Foreldramyndugleika, Samveru Og Bústaðin Hjá Barninum (1)